एक्लै हिँडेको पल आउनेछौ
कि भीडको माझ उठाउनेछौ ?
हावा बनी फूल चुडाउँछौ कि
बाढी बनी फेद बगाउँछौ कि ??
सुटुक्क आई सपना बनेर
बुझ्छौ कि मेरो मनको विचार ?
छाड्छौ कि एक्लै अलपत्र पारी
लान्छौ कि आफैँसित सिन्धुपारि ??
थाहा छ यो निश्चित जन्मिएर
जानै छ तिम्रो घर अन्मिएर ।
तिम्रो प्रशंसा कसले दिएनन् ?
हिजो गएका किन फर्किएनन् ??
भन्छन् छ तिम्रो नगरी विराट
नेपाल देखिन्छ कि झ्यालबाट ?
लाग्दैन निद्रा कविता नगाई --
पाइन्छ कस्तो रङ लेख्नलाई ??
भन्दैछ साथी पनि ‘जान पाए’
म लान्छु आफैँसित लान पाए ।
मौका मिले अन्तिम एकफेर
जानेछु ‘आमा ! म गएँ’ भनेर ।।
(उपजाति)
