यै देशको नाम जपेर मर्छु -उपजाति

यै देशको नाम जपेर मर्छु -उपजाति
 .................................... 
जस्तो छ नेपाल विशेष जे छ 
 पुर्खाहरूको बलिदानले छ । 
 यहीँ बग्यो रक्त नदी समान 
माटो बचाए नभनेर ज्यान ।।
 .................................... 
यो देशका निम्ति लडेर मर्नु 
ठुलो कुरा होइन झैँ नगर्नू । 
छाती हुँदा छेद प्रहारबाट 
हट्दैन मुस्कान मुहारबाट ।। 
 .................................... 
जहाँ छ छातीभरि देशभक्ति 
 केही नखाए पनि मिल्छ शक्ति । 
हटे भयो दुस्मनले डराई 
बाँकी छ यो जीवन लड्नलाई ।।
 .................................... 
यो हात हो देश नशा नदी हुन् 
औँलाहरू पश्चिम काँगडा हुन् । 
सानो छ नक्सा यति प्यार गर्छु
प्रहार सानो कसरी सहन्छु ?? 
.................................... 
डुब्दा तराई म स्वयम् डुबेँ कि ? 
पहाड खस्दा म स्वयम् खसेँ कि ? 
बढ्दो छ मेरो मुटुभित्र छाल 
झन् होचिएला कि कतै हिमाल ?? 
.................................... 
सके यहीँ फूल फुलाउनेछु 
सम्पूर्ण संसार भुलाउनेछु । 
म एक सङ्कल्प सदैव गर्छु 
यै देशको नाम जपेर मर्छु ।।