मलाई पटक्कै हतार छैन...

मध्यरात भैसक्दा पनि खयालमा हराइरहूँजस्तो लाग्छ । यौटै गीत एकासीऔँपटक सुन्दा पनि प्रेमिल लागिरहन्छ । कल्पनामा मुस्कुराइरहूँजस्तो लाग्छ । नदी किनारामा उभिरहूँझैँ लाग्छ । हरिया घाँसहरूमाथि लेटिरहन मन लाग्छ । बगैँचामा बसेर फूलहरूलाई हेरिरहूँ लाग्छ । यो एक्लो शून्य सडकमा एक्लै रमाउँदै हिड्ने रहर कहिल्यै पुग्दैन । बेलुकीपख जमिनमा पल्टिएर आकासमा हेर्न पाउँदा आँखाहरूलाई थकाइ लाग्दैन । त्यस्तै आँगनछेउमा बसेर घण्टौँसम्म चिसो बतास लिन्छु, यो मन कहिल्यै भरिन्न । बगिरहेको खोलाको पानीमा खुट्टा डुबाएर एकतमाससँग बसेर पनि म सिङ्गो जिन्दगी काटिदिन सक्छु । हरेक क्षण मलाई यस्तो लाग्छ कि यस्तो क्षण जिन्दगीमा अब कहिल्यै दोहोरिएर आउने छैन ...