चाहिन्न केही अरू

मेरो यो मुखमा मिठो र गुलियो मात्रै परोस् भन्दिनँ

मेरो आँगनमा सधैँ कुसुमको बर्सात होस् भन्दिनँ

छातीमा पुसको चिसो पसिरहोस् हाेस् अाङ नाङ्गो बरु

मेरो देश स्वतन्त्र सुन्दर रहे चाहिन्न केही अरू ।

सानो होस् झुपडी पहाड भिरमा यो जिन्दगानीभरि

दुःखैदुःख, अभाव होस् कठिन होस् मेरो कहानीभरि

पैसासङ्ग विशाल देश जनता साटेर पो के गरूँ

वैरीको अघि झुक्न लुक्न चाहिन्न केही अरू ।

मान्छेको सिप देखिए, प्रकृतिको पाइन्न पृथ्वीभर

यी हाम्रा हरिया पहाड चुचुरा यस्तै रहोस् सुन्दर

होलान् लाख हिमाल खोँच पहरा गाह्रा उकालाहरू

यौटा पर्वतमात्र चढ्न सकिए चाहिन्न केही अरू ।

छैनन् जीवनमा करोड रुपियाँ कुम्ल्याउने चाहना

मैले ईश्वरको अगाडि अहिले के गर्नु खै प्रार्थना

मात्रै शान्त खुसी समुन्नत रहून् आफन्त साथीहरू 

आमाको गह भत्किई नचुहियोस् चाहिन्न केही अरू ।