तयार छु प्रिय

भरमा पर्छ्यौ भने, तयार छु प्रिय
आशा गर्छ्यौ भने, तयार छु प्रिय
सँधै संगै बांच्न नसके पनि
संगै मर्छ्यौ भने, तयार छु प्रिय

ओहोरदोहोर

ओहोरदोहोर

भित्र, म भित्र
मेरो मुटुको अर्थात्
मेरो जीन्दगीको सबैभन्दा नजीक
जहां निरन्तर,
धैर्यताकासाथ,
म चलुं या ढलुं
पुग्दै फर्कंदै गरीरहन्छ यो हावा

जांदा एउटा आभाष लेर जान्छ
कसैको
जो त्यहां आजपनि उसरी नै टहल्दैछ
मलाई ब्युंझाउंदै तर्साउंदै
जसरी हावा मभित्र दौडधुप गर्छ
हो त्यसैको
जांदा नसुनिने;
कहिल्यै नसुनिएको आवाज लेर जान्छ

लगत्तै केही आत्तिन्छन्;
मात्तिन्छन्; तात्तिन्छन्;
जो एक्लै दुनियां सामु
आज बीच मण्डपमा मञ्चित छिन्
ठीक उसैलाई
आफ्नै गोरेटोमा हराएकी देख्दा
रगत खुसी भै दौडिन्छ
त्यही रगतमा मन पौडिन्छ
जति चालेनि डुब्छ तर मर्दैन
हो मन मर्दैन

सबै त्यहीं हुन्छ
हुनसक्ने र हुने
त्यहीबेला हुन्छ
जब सबै निस्किन्छ
जो भित्रबाट, म भित्रबाट
मेरो मुटुको अर्थात्...

त्यो मान्छेले

क्यै नगुमाई क्यै पाउंछ त्यो मान्छेले
खै के के खान भ्याउंछ त्यो मान्छेले
नत्र कसरी अमृत बिष बन्छ र ?
सबै चपाउंछ पचाउंछ त्यो मान्छेले

बन्न नखोज

साथी जिउंदो लास बन्न नखोज
यस्तो कुरामा उदास बन्न नखोज
आफैंलाई आफ्नै नजरमा गिराएर
कसैको नजरमा खास बन्न नखोज

याद गर

मरी मेट्दैछु त्यै भन्न याद गर
दुरी छेड्दैछु त्यै भन्न याद गर
भैसक्यो भयो भन्न मात्र बांकी छ
फेरी भेट्दैछु त्यै भन्न याद गर

हतारमा छौ तिमी

नमिलेको

हतारमा छु प्रिय म, हतारमा छौ तिमी
किन छुट्नुपर्दा फेरी, दोधारमा छौ तिमी

खबर मेरो देखिहाल्यो बरु तिम्रो भन
सुनेको छु आनन्दको, संघारमा छौ तिमी

गल्ती भो फेरी तिम्रो बाटोमा आईपुगें
अब जाउ जुन बाटोको, सवारमा छौ तिमी

हेर  म त  तिमीजस्तो  फेरिएको छैन
फुटपाथ मेरो घर हो प्रिय, दर्बारमा छौ तिमी

शुभचिन्तक हुं म त तिम्रै , झर्को नमान
भन फेरी किन अचेल, दिक्दारमा छौ तिमी

के दिउं जवाफ मेरो मायामा अझै प्रश्न गर्छौ
दिलमा मेरो अर्कैको, निधारमा छौ तिमी

गफै पो हो कि

सँगै बाँच्ने सँगै मर्ने गफै पो हो कि
अहिलेसम्म तिम्ले गर्ने गफै पो हो कि
//
ठीकै भन्यो गाह्रो अफ्ट्यारो आईपर्छ
दुवै जना मिली टर्ने गफै पो हो कि
//
यति ठूलो संसार छ धेरै मान्छे छन्
तिमीलाई म नै मनपर्ने गफै पो हो कि
//
म देखिरहेछु यहाँ मरुभूमी जताततै
भन्यौ समुन्द्र सँगै तर्ने गफै पो हो कि
//
मेरा जस्तै प्यारा आमा बुवा छाडेर
मेरो लागि बसाँई सर्ने गफै पो हो कि